Saturday, January 2, 2010

ગીત : ‘પીડા’ એક મનગમતું નામ

અમે પીડાઓ ચિતરાવી હાથમાં
મહેંદીની જેમ એના ઊભરાશે રંગ અને એને પણ ભરવાના શ્વાસમાં

અમે પીડાઓ ચિતરાવી હાથમાં

રાતોના સંચાથી સપનાની પેન્સિલને ઘસવાના કામ અમે કીધાં
કોઇ વરસ્યુ અગાઢ અને સામે અમેય ખોબે ખોબે ઊજાગરાઓ પીધાં
મને રસ્તાઓ મેણલાઓ મારે છે એવા 'આને મેલી આવો મજનુના ગામમાં'

અમે પીડાઓ ચિતરાવી હાથમાં

તારી મીઠપ જોઈને અમે દરિયો થઈ જઈએ અને વાદળાઓ વરસાવે પ્યાર,
તને ધસમસતી ધસમસતી બાંહોમાં લઈએ જાણે નદિયુંનો તું હો અવતાર
સાંજોની સાંજોને ગૂંથ્યા કરીશું પછી વીણી ભરેલ તારા વાળમાં

અમે પીડાઓ ચિતરાવી હાથમાં

- જિગર જોષી ‘પ્રેમ’

તાદર્થ્ય – નવેમ્બર-2009

No comments: